सहजयोग श्रीमाताजी श्रीनिर्मलादेवीज्यूद्वारा प्रतिपादित (कुण्डलिनी जागरण) आत्मसाक्षातकारको अनुभवमा आधारित ध्यानको अनुपम विधि हो। हरेक मनुष्यमा जन्मदेखि नैं एक सूक्ष्मतन्त्र र कुण्डलिनी शक्ति रहेको हुन्छ जुन जागृत भएपछि सजिलै योगलाई प्राप्त गर्न सकिन्छ जसलाई सहजयोग भनिन्छ । सहजयोग एउटा यस्तो योग हो जो सजिलै स्वतः घटित हुन्छ जसले हाम्रो चित्तलाई कुण्डलिनी जागृतिको माध्यमबाट परमात्मासँग एकाकारिता गराउँदछ र चैतन्यको अनुभूति प्रदान गर्दछ । यही अनुभूतिलाई आत्मसाक्षात्कार भनिन्छ जुन सबै धर्म तथा ग्रन्थहरुमा वर्णन गरिएको पाइन्छ । सहजयोग तथा अन्य धार्मिक विधिहरुमा अन्तर यो छ कि आत्मसाक्षात्कार हाम्रो आध्यात्मिक उत्क्रान्तिको आरम्भ हो नकि कुनै दुर्लभ र असाध्य लक्ष्य । तर यस आध्यात्मिक शक्ति कुण्डलिनीको जागृति प्राप्त गर्नको लागि साधकमा सत्यलाई जान्ने शुद्ध इच्छा हुनुपर्दछ साथै माध्यमको रुपमा श्रीमाताजी स्वयं वा कुनै आत्मसाक्षात्कारी व्यक्तिको उपस्थिति हुनु पनि आवश्यक छ ।